Android təhlükəli tətbiqləri daha yaxşı təyin edəcək

Google Play-in ən son versiyasının kodunda Live Threat Detection alətinin yeni funksiyalarına dair məlumatlar aşkarlanıb. Bu alət cihazda potensial təhlükəli proqram təminatını müəyyən etmək üçün istifadə olunur və tezliklə daha da səmərəli işləyəcək. Hazırda Live Threat Detection süni intellekt alqoritmlərindən istifadə edərək cihazdakı tətbiqlərin şübhəli davranışlarını aşkar edir. Yeniləmədən sonra smartfon istifadəçini xəbərdar edəcək ki, hər hansı tətbiq onun yerini və ya fəaliyyətlərini izləyir. Bu halda problemli tətbiqin silinməsi və ya icazələrinin məhdudlaşdırılması ilə bağlı tövsiyələr də təqdim olunacaq. İxtisaslaşmış media qurumlarının məlumatına görə, Live Threat Detection yaxın zamanda Play Protect Service bölməsində ayrıca səhifə əldə edəcək. Həmin səhifədə bu alətin potensial təhlükəli kimi müəyyən etdiyi tətbiqlərin siyahısı yer alacaq. Yenilik ilk olaraq müasir Pixel smartfon modellərində təqdim ediləcək, daha sonra isə Android 16 sisteminin standart komponentinə çevriləcəyi gözlənilir.